ISSN (Print) - 0012-9976 | ISSN (Online) - 2349-8846

బలవంతంగా ఆధార్ అమలు

సంక్షేమ రాజ్యానికి, నిఘా పెట్టే రాజ్యానికి మధ్య చెరిగిపోతున్న గీత

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

ఆహార పదార్థాల అందుబాటుకు ఉన్న హక్కులపై ఆంక్షలు విధించడం సంక్షేమ రాజ్య లక్షణం కాదు. మధ్యాహ్న భోజన సదుపాయం వినియోగించుకోవాలంటే ఆధార్ కార్డు సంఖ్య తప్పని సరి అంటూ ప్రభుత్వం ఇటీవల జారీ చేసిన ఉత్తర్వుపై నిరసన వ్యక్తం కావడం న్యాయమైందే. కొన్ని రాష్ట్రాలు ప్రభుత్వ పంపిణీకి ఆధార్ తప్పని సరి అంటూ జారీ చేసిన ఉత్తర్వులపై వివాదం సద్దు మణగక ముందే ఈ ఉత్తర్వు వెలువడడం అసాధారణమైందే. ఆధార్ రికార్డులు సరిగ్గా లేనందువల్ల, వాటి ప్రామాణీకరణ సవ్యంగా లేనందువల్ల అసలైన లబ్ధిదారులను ప్రభుత్వ పంపిణీ నుంచి మినహాయించినట్టు అయిందని గుజరాత్, జార్ఖండ్, ఆంధ్ర ప్రదేశ్ రాష్ట్రాల నుంచి వార్తలు వచ్చాయి. దీనికి తోడు సాంకేతికమైన, మౌలిక సదుపాయలకు సంబంధించిన సమస్యలు కూడా ఉన్నాయి. ఈ అనుభవాన్ని బట్టి సాంకేతికతను మరింతగా ఉపయోగించడం అవినీతికి, సరుకులు అందించడంలో అసమర్థకు ప్రత్యామ్నాయం కాదని ప్రభుత్వం గుణపాఠాలు నేర్చుకుని ఉండాల్సింది. దీనివల్ల జరిగిందల్లా సామాజికంగా, ఆర్థికంగా వెనుకబడి ఉన్నవారికి ఆ సదుపాయాలు అందకుండా పోవడమే.

అయినప్పటికీ దాదాపు 30 పథకాలను ఆధార్ పరిధిలోకి తీసుకు వస్తూ గత కొద్ది వారాలలో అనేక మంత్రిత్వ శాఖలు ఉత్తర్వులు జారీ చేశాయి. మహాత్మా గాంధీ గ్రామీణ ఉపాధి హామీ పథకం, ఉద్యోగుల ప్రావిడెంట్ ఫండ్, పింఛన్, ఉపకార వేతనాలకు సంబంధించిన పథకాలు, చివరకు 1984 లో భోపాల్ గ్యాస్ బాధితులకు సహాయం అందజేయడాన్ని కూడా ఆధార్ పరిధిలోకి, ప్రత్యక్ష నగదు బదిలీ విధానం కిందకు తీసుకొచ్చారు.

ప్రభుత్వం నిరాకరిస్తున్నప్పటికీ ఈ ఉత్తర్వులన్ని ప్రభుత్వ పథకాల వల్ల ప్రయోజనం పొందడం ప్రజల హక్కు అయినప్పుడు ఆధార్ ను తప్పని సరి చేయడం సరైంది కాదని అనేక సంవత్సరాలుగా సుప్రీం కోర్టు ఇచ్చిన తీర్పులకు విరుద్ధమైనవే. ఈ వ్యవహారం ఇంకా న్యాయస్థానాల పరిశీలనలో ఉంది. కాని "ఏ వ్యక్తికైనా ఆధార్ సంఖ్య లేకపోతే అది వచ్చే వరకు మరో గుర్తింపు ఉంటే ప్రయోజనం పొందవచ్చును" అని అసలు వ్యవహారాన్ని పక్క దారి పట్టిస్తూ ప్రభుత్వం ఒక పత్రికా ప్రకటనలో తెలియజేసింది. ప్రజలు ఈ ప్రయోజనాలు పొందడానికి ఆధార్ సంఖ్య అవసరమై అది లేకపోతే లబ్ధి పొందే వారు మరో గుర్తింపు పత్రం చూపాలి అని ఇటీవల జారీ చేసిన ఉత్తర్వులు తెలియజేస్తున్నాయి. దీన్ని బట్టి, వీటి అమలుకు కచ్చితమైన గడువు నిర్ణయించినందువల్ల ఆధార్ ను తప్పని సరి చేస్తున్నారు అని స్పష్టం అవుతోంది.

ప్రభుత్వ పథకాలు పక్క దారి పట్టకుండా, అమలు చేసే పథకాలు దాపరికం లేకుండా అమలు చేయడానికి, అర్హులు కాని లబ్ధిదారులను ఏరి వేయడానికి ఆధార్ అద్భుతమైన మంత్ర దండం అని ప్రభుత్వాలు చెప్తూనే ఉన్నాయి. "దీని వల్ల అపారమైన ప్రజా ధనం వృధా కాకుండా నివారించ వచ్చు" అని ప్రభుత్వాలు చెప్తున్నాయి. కాని ప్రభుత్వాలు ఆధార్ పథకం ప్రజలకు సంబంధించిన సమాచారం డిజిటల్ రూపంలో సేకరించడం, నియంత్రించడం, ఈ మహా సమాచారం పై నిఘా పెట్టే అవకాశం ఉందని మాత్రం ప్రభుత్వాలు చెప్పడం లేదు. (అంటే డిజిటల్ రూపంలో ఉన్న కీలక వ్యక్తిగత సమాచారాన్ని పర్యవేక్షించడం, నిఘా పెట్టడం). కార్గిల్ యుద్ధం తర్వాత భద్రతా చర్యల్లో భాగంగా, నిఘా వేసి ఉంచడానికి భారతీయ జనతా పార్టీ నాయకత్వంలోని ఎన్.డి.ఏ. ప్రభుత్వం మొదటి సారి ఆధార్ విధానాన్ని ప్రవేశ పెట్టింది. ఇప్పుడు అమలు చేస్తున్న ఆధార్ లక్షణాలు కూడా ఇవే. అదీ గాక పటిష్ఠమైన గోప్యతా చట్టాన్ని, మహా సమాచారాన్ని నియంత్రించే  వ్యవస్థను ఏర్పాటు చేయకుండానే, రాజ్యాంగ పరమైన నిబంధనలను పక్కన పెట్టి ప్రభుత్వం ఆధార్ పథకాన్ని అమలు చేస్తోంది. దీని కోసం 2016 ఆధార్ (ఆర్థిక, ఇతర సబ్సిడీలను నిర్దిష్టంగా అమలు) చట్టం తీసుకొచ్చింది. దీని కోసం సుప్రీం కోర్టు ఆదేశాలను బాహాటంగా ఉల్లంఘించింది. ఆధార్ ను తప్పని సరి చేసింది.

సామాన్య పౌరుడి దృష్టితో చూస్తే ఆధార్ లో కలవరం కలిగించే అంశం ఏమిటంటే ఈ బయో మెట్రిక్ సమాచారం అంతా ఎవరి నియంత్రణలో ఉంటుంది, దీన్ని ఎవరు వినియోగించగలుగుతారు అన్నదే. ఆధార్ కార్డు తీసుకోవడానికి అందజేసే దరఖాస్తులో చాలా అస్పష్టంగా "సమ్మతిస్తున్నాను" అన్న అంశం ఉంది. "భారత విశిష్ట గుర్తింపు వ్వ్యవస్థ నేను ఇచ్చిన సమాచారాన్ని ఆ సంస్థ ఇతరులతో అంటే ప్రభుత్వ పంపిణీ విధానాన్ని, సంక్షేమ పథకాలు అమలు చేసే వ్యవస్థలకు భవిష్యత్తు వినియోగం కోసం తెలియజేయడానికి 'సమ్మతిస్తున్నాను ' అన్న అంశం ఈ దరఖాస్తు ఫారంలో ఉంటుంది. ఈ మాటలకు నిర్దిష్టమైన అర్థం ఏమిటో ప్రభుత్వం నిర్వచించలేదు. కాని ఆధార్ కార్డు నమోదు సిబ్బంది భవిష్యత్తు ప్రయోజనం కోసం దీనికి అంగీకరించాలి అని నచ్చ చెప్తూ ఉంటారు. ఆధార్ ను ప్రచారం చేయడంలో  ఈ సమ్మతి ఇవ్వడం ఏమిటో ప్రభుత్వం స్పష్టంగా చెప్పడం లేదు. అలాగే ఆధార్ లో ఉన్న బయో మెట్రిక్ సమాచారాన్ని అందకుండా చేసే అవకాశం ఉందని (మామూలుగా అది అందేట్టుగా) ఉంటుంది అని కూడా ప్రభుత్వం చెప్పడం లేదు. నమోదు చేసుకున్న మొబైల్ నంబర్ ద్వారా ఓ.టి.పి. (ఒక సారి వినియోగించుకునే పాస్ వర్డ్) ద్వారా ఈ సమాచారాన్ని పొందడానికి భారత విశిష్ట గుర్తింపు వ్వ్యవస్థకు అనుమతించే అవకాశం ఉంటుంది. ఈ లక్షణం గురించి ప్రభుత్వం చెప్పదు. పైగా కంప్యూటర్, మొబైల్ ఫోన్ అందుబాటులో లేని వారికి దీనికీ అవకాశం ఉండదు.

ఆధార్ చట్టం ఈ అంశాలను ప్రస్తావించను కూడా ప్రస్తావించదు. పైగా 57వ క్లాజును చేర్చడం ద్వారా దీన్ని మరింత తికమకగా తయారు చేసింది. ఆ క్లాజులో: "ఈ చట్టంలో ఏమి ఉన్నప్పటికీ ఒక వ్యక్తి గుర్తింపును ఏ ప్రయోజనం కోసమైనా, అది ప్రభుత్వమైనా, లేదా కార్పొరేట్ సంస్థ అయినా, లేదా వ్యక్తి అయినా, అమలులో ఉన్న ఏ చట్టం ప్రకారం అయినా, ఏ ఒప్పందం ప్రకారమైనా వినియోగించడానికి అడ్డంకి కాదు" అని ఉంది. ఇలాంటి నిబంధన ప్రభుత్వంతో సంబంధం లేని వారు కూడా ఆధార్ ను అధీకృతం చేయడానికి, సమాచారం సంపాదించడానికి వీలుంటుంది. అది ఇప్పటికే జరిగింది. అనేక ఫిర్యాదులు అందినందువల్ల ఇటీవలే భారత విశిష్ట గుర్తింపు వ్వ్యవస్థ  24 సంస్థలు అనధీకృత పద్ధతిలో ఆధార్ సమాచారాన్ని వినియోగించకుండా చేసింది. దీనికి తోడు "బయోమెట్రి సమాచారం" అంటే చట్టంలో నిర్వచనం చాలా అస్పష్టంగా ఉంది. ఈ చట్టం ఇతర జీవ సంబంధ సమాచారాన్ని (అంటే డి.ఎన్.ఎ.) కూడా భవిష్యత్తులో తెలుసుకోవడానికి వీలు కల్పిస్తోంది. అంతే కాకుండా సుప్రీం కోర్టు 2017 ఫిబ్రవరిలో ఇచ్చిన ఉత్తర్వులు ఆధార్ ను తప్పని సరి చేయకూడదు అని ఇంతకు ముందు ఇచ్చిన తీర్పులకు పూర్తి విరుద్ధంగా ఉంది. దీని ప్రకారం అన్ని సిం కార్డులను (చందాదారుడి గుర్తింపు సమాచారం) ఆధార్ తో అనుసంధానించడాన్ని నిర్బంధం చేస్తారు. ఇవన్నీ అధార్ లో అందుబాటులో ఉన్న మహా సమాచారాన్ని ఎవరు నియత్రిస్తారు, వినియోగిస్తారు అన్న సందేహాలు ఉత్పన్నమవుతాయి. ఇది కేవలం జనాభా స్వరూపానికి మాత్రమే పరిమితమైన వ్యవహారం కాదు. ఇది బయో మెట్రిక్ సమాచారానికి సంబంధించింది కూడా.

ఆధార్ గురించి విపరీతంగా ప్రచారం చేయడం ద్వారా భారత రాజ్య వ్యవస్థ ఒక కార్పొరేట్ సంస్థలా వ్యవహరిస్తోంది. కార్పొరేట్ సంస్థలు మనకు సంబంధించిన సమాచారాన్ని అందజేసే షరతుపై సేవలు అందజేస్తాయి. ఈ సమాచారంపై అవి నిఘా పెట్టవచ్చు. ప్రజలు దాపరికం లేకుండా ఉండాలి అని చెప్పే ప్రభుత్వం తాను దాపరికం లేకుండా ఉండడం లేదని మాత్రం స్పష్టం అవుతోంది.

 

 

Updated On : 13th Nov, 2017
Back to Top